DNX HILIGAYNON: Ang masunod isa ka news release gikan sa media bureau ni Mayor Mhai Mhai Mangilimutan sang banwa sang La Castellana. Ginbalhag ini sa iya kabug-usan.
LA CASTELLANA, Negros Occidental – Duha ka tinaga ang nagasulod sa panghuna-huna sang una kon mamitlangan ang ini nga banwa.
Una, yab-okon, ikaduha, rebelyon.
Sa malawig nga panahon, ang banwa sang La Castellana nga yara sa tiilan sang matahum nga bulkan sang Kanlaon wala sang maayo nga mga dalanon kag isa sa mga pugaran sang mga rebelde.
Halos wala sang pagtin-ad apang sa dalayon nangin isa ini ka first class nga banwa nga may yara sang malapit 80 mil ka mga pumuluyo.
Ang alkalde sini nga si Alme Rhummyla Mangilimutan nagahandum sa karon sang tatlo ka dalagku nga mga proyekto nga magasabat sa nagasangkad nga kinahanglanon sang iya sini mga katawhan.
Bilang isa ka manunudlo sang Technology and Livelihood Education, nagapati si Mayor Mhai nga kinahanglan ang entrepreneurial leadership ukon ang matinu-aron nga pagpamuno.
Sa pihak sang nagaluntad nga pandemic kag paghuyang sang ekonomiya, siya nagapati nga kinahanglan ang paghimo pamaagi agud makakita ang kada pumuluyo kag bisan ang lokal nga panguluhan.
Makasaysayan ang lihok ni Mayor Mhai sa pagpinsar nga kinahanglanon na gid sang ila banwa sang kaugalingon nga kolehiyo, ospital kag sanitary landfill ukon halabuyan sang basura.
KAUGALINGON NGA OSPITAL
Suno kay Mangilimutan, handum nila makaangkon sang kaugalingon nga ospital agud masabat ang kinahanglan sa ikaayong lawas sang ila pumuluyo kadam an sini mga mangunguma nga ginakulang ang kita.
Sa karon, ang pinakamalapit nga ospital amo ang Don Salvador Benedicto Memorial Hospital sa syudad sang La Carlota nga mga 20 kilometro ang kalayuon.
“Mas madasig ang pagtatap sa mga pumuluyo kon may yara kami sang amon ospital,” pahayag ni Mayor Mhai sa DNX angut sa iya handum.
Bilang tumandok sang banwa, nakahibalo si Mayor Mhai nga madamo sang mga pumuluyo diri sa 13 ka mga barangay nga nagapuyo sa binukid nga bahin kabangdanan nga dapat mapasanyog ang serbisyo sa ikaayong lawas.
Labi pa gid nga kinahanglanon ang ospital bangud sang nagapadayon nga COVID pandemic, dugang pa sini.
Sa karon, indi magnubo sa lima ka mga ambulansya ang nabakal na sang banwa agud gamiton sang mga pumuluyo.
Libre ang pag gamit sang mga ini.
KAUGALINGON NGA KOLEHIYO
Magluwas sa ospital, handum man ni Mayor Mhai ang pagpatukod sang kaugalingon nga kolehiyo sa diin makabutho sang libre iya pumuluyo para sa mataas nga halintang sang edukasyon.
Sa karon, ang pinakamalapit nga kolehiyo sang gobyerno yara sa syudad sang Himamaylan nga nagalayo sang mga 40 kilometro gikan diri.
Nagapati si Mangilimutan bilang isa ka anay manunudlo nga tuman ka bilidhon ang paghatag kahigayunan sa pamatan-on nga makaeskwela sa kolehiyo agud magsanyog ila mga kabuhi.
Si Mangilimutan nakatapos man sang iya kurso sa Abogasiya kag nagakinahanglan na lang makapasar sa Bar Exams agud mangin abogado.
Bantayan ang kasugpon sini nga report.
