Magapalayag na sa kahanginan sang Internet ang Radio X sang Digital News Exchange sa tuyo nga makabulig sa pagpahangop kag pagpasanag sa mga bagay kag mga hitabo may kaangtanan sa nCoronavirus.
Kabahin ini sang emergency broadcast services nga ginatanyag sang DNX agud makabulig paathag sa mga pumuluyo.
Ginpahayag ni Julius Mariveles, ang executive editor sang DNX nga labi nga kinahanglanon ang gilayon, husto kag hapos mahangpan nga mga pagpahibalo sa pumuluyo agud malikawan ang kinagula, kahangawa kag kakulba dala sang kakulang sang paghangop.
Si Mariveles isa ka anay news director sa radyo, komentarista, taghimo sang dokumentaryo para sa radyo kag karon pamuno sang Second Wind Media Ventures, ang kumbuyahan nga nagapanag-iya sang Digital News Exchange.
Kabahin sang mga labing una nga palatuntunan sang Radio X amo ang pagpaathag bahin sa nCoronavirus nga isa ka daku nga kabalaka sa bug-os nga kalibutan.
Upod kay Mariveles sa Radyo DNX amo sanday Hannah Papasin, managing editor sang DNX kag pamuno sang Communication Department sang University of St. La Salle, Banjo Hinolan, pamuno para sa telebisyon sang DNX, Richard Meriveles nga pamuno sa teknolohiya sang DNX kag Neska Centina nga anay reporter sa radyo kag karon manunulat sang DNX.
Ang Radio X magapalayag una sa Facebook kag YouTube sang DNX.
